stornur-hamarNú rétt í þessu lauk vígsluathöfn Hamarshallarinnar þar sem meðal annarra viðburða var boðið upp á leik stjörnuliðs Atla Eðvaldssonar gegn (h)eldri Hamarsmönnum. 

Úrslit leiksins eru eitthvað á reiki og eru frásagnir þátttakenda og áhorfenda um þau misvísandi. Um það var rætt meðal áhorfenda að heiti potturinn í Laugaskarði yrði þéttsetinn eftir leik og að pantanir í sjúkranudd færu væntanlega að streyma til sjúkraþjálfara strax í fyrramálið. Leikurinn sjálfur var þó góð skemmtun og sáust ýmis skemmtileg tilþrif leikmanna og dómara sem allir áttu góðan dag og ekki að sjá að nokkur þeirra hafi formlega lagt skóna frægu á hilluna (einn úr stjörnuliðinu er enn að og er orðrómur um að vegna þess verði úrslit leiksins kærð, hver sem þau nú voru…).  

Það er nokkuð víst að sú aðstaða til íþróttaiðkunar sem nú er komin í Hveragerði verður iðkendum á öllum aldri til ánægju, yndisauka og hagsbóta. Til hamingju Hvergerðingar nær og fjær! 

hamarshollinSá skemmtilegi og langþráði viðburður að Hamarshöllin verði formlega vígð á sér stað sunnudaginn 19. ágúst kl. 15:00. Loksins eru Hvergerðingar komnir með íþróttaaðstöðu sem hæfir 21. öldinni og er hér um gríðarlega lyftistöng fyrir íþróttalíf og bæjarbúa í heild að ræða.

Búast má við fjölmenni í Hamarshöllina og verður án efa hápunktur dagsins leikur stjörnuliðs Atla Eðvaldssonar, fv. atvinnumanns og landsliðsþjálfara, gegn „gömlum“ hetjum hvergerðskrar knattspyrnusögu. Þess ber að geta að Atli Eðvaldsson varð fyrsti erlendi leikmaður þýsku Bundeligunnar til að skora 5 mörk í leik með liði sínu Fortuna Dusseldorf gegn Eintracht Frankfurt, laugardaginn 4. júní 1983 er Dusseldorf sigraði 5-1 í lokaleik tímabilsins. Afreks Atla er m.a. minnst hér í sömu andrá og ekki ómerkari manna en Messi, Jurgen Klinsman og Andy Cole.

Við hverjum alla Hvergerðinga sem og gesti til að mæta og samgleðjast með okkur og um leið berja hinar “fornu“ stórstjörnur augum í leik aldarinnar.

1x2_logoNú um helgina hefst loksins enska úrvalsdeildin eftir sumarhlé. 

Töluverðar breytingar hafa orðið á ensku liðunum og spennandi að sjá hvernig deildin spilast í vetur. Þar sem enski boltinn hefur löngum talist ein af þjóðaríþróttum Íslendinga, myndast um hverja helgi mikil spenna fyrir úrslitum leikja. Hefð hefur skapast fyrir að “tippa” á úrslit og eru menn og konur mis-getspök í þeim efnum, eins og gengur og gerist. 

Þeir sem tippa á leiki geta merkt við félagsnúmer á seðlunum sínum, hvort heldur á pappírnum eða á netinu, og með því að skrá 810 er verið að styðja við uppbyggingarstarf knattspyrnudeildar Hamars. Þeir sem tippa eru því hvattir sérstaklega til að merkja við 810 því hlutfall af hverjum keyptum seðli rennur til félagsins án þess að skerða vinningsupphæð, komi til þess. 

Hægt er að tippa á leiki inn á heimasíðu Íslenskra getrauna og er tengill inn á síðuna HÉR

Styðjum Hamar og merkjum við 810 á seðlinum.

hamars_bergrisiHamar sigraði Dalvík/Reyni í lokaleik 16. umferðar 2. deildar á Grýluvelli í kvöld. Lokatölur leiksins urðu 2-1 eftir að jafnt hafði verið í hálfleik, 1-1. 

Gestirnir í D/R komust yfir á 19. mínútu með föstu skoti sem fór af varnarþvögu Hamars og inn. Nýi skiptineminn okkar, Abdoulaye Ndiaye, jafnaði leikinn með glæsilegu marki beint úr aukaspyrnu á 44. mínútu. Nokkuð jafnræði hafði verið með liðunum en gestirnir þó sterkari framan af hálfleiknum. 

Hamar tók völdin á vellinum í síðari hálfleik en átti erfitt með að finna netmöskvann allt þar til “gamli” skiptineminn okkar, Sene Abdalha, kom boltanu yfir línuna á 90. mínútu eftir frekar ódýra hornspyrnu. Gestirnir í D/R höfðu sótt í sig veðrið undir lok leiks og voru allt eins líklegir til að stela sigrinum en ein af fjölmörgum sérkennilegum ákvörðunum dómatríósins færði okkar mönnum þá hornspyrnu sem skóp sigurmarkið. Þess ber þó að geta að á hvorugt liðið hallaði sérstaklega í dómgæslunni og geta dómarar, eins og aðrir, átt sína slæmu daga. Verra þætti pistlahöfundi ef hagur Hamars hefði beðið skaða vegna þess er lokaflutið loksins gall. Það er því vonandi að Hamarsmenn hafi fundið lukkudísirnar eftirsóttu og þeim takist að halda þeim heilum og í lagi út tímabilið.

 

Hamarsmenn taka á móti Eyfirðingunum í Dalvík/Reyni fimmtudaginn 16. ágúst á Grýluvelli kl. 19:00. Það verður án efa hart barist á vellinum og vilja Hamarsmenn væntanlega viðhalda sínu góða gengi í deildinni undanfarið. 

Gestirnir að norðan eru ekki langt frá Hamarsmönnum í deildinni, D/R situr í 8. sætinu á meðan Hamar er í því 10. Síðustu fimm leikir D/R hafa fært þeim 9 stig og er markatalan úr þeim leikjum 7-6 D/R í vil. Hamarsmenn hafa aftur á móti landað 6 stigum úr síðustu fimm leikjum sínum og eru með markatöluna 9-9. Frá því að nýju liðsmenn Hamars léku sína fyrstu leiki í konungbláa litnum, hefur Hamar unnið tvo af þremur leikjum sínum, skorað 8 mörk og fengið á sig 3. 

Með sigri gegn D/R færist Hamar fjær hættusvæðinu í deildinni því bæði Fjarðabyggð og KFR töpuðu leikjum sínum í 16. umferðinni, sem þessi leikur er hluti af. Það er því mikið í húfi á Grýluvelli fimmtudaginn 16. ágúst og frá kl. 19:00 til u.þ.b. 20:54 má búast við baráttu og spennu sem gæti endað með gosi í Grýlu gömlu ef allt gengur vel. 

Fjölmennum á leikinn og styðjum Hamar til sigurs. 

Áfram Hamar!!!

Skráningardagur yngri flokka knattspyrnudeildar Hamars. 

Skráningar í flokka fyrir næsta vetur (1. sept til 28. feb.) í Hamarshöllinni verða fimmtudaginn 16. ágúst frá kl. 17:00-19:00 í Hamarshúsinu við Grýluvöll. 

Æfingar frá 8. flokki (leikskólaaldur) og upp úr í boði fyrir stráka, stelpur, karla og konur! 

Komið og æfið vinsælustu íþrótt veraldar við bestu aðstæður á Íslandi!

3.flokkur_2012Lagt var af stað úr Hveragerði í kringum níu á laugardagsmorgni í grenjandi rigningu. Hópurinn var fámennur en góðmennur og mikil tilhlökkun hjá drengjunum að fara að keppa. Ferðin norður tók örlítið lengri tíma en áætlað hafði verið sökum þess að þjálfarinn og fararstjórinn var alveg ókunnur sela- og ísbjarnaslóðum áfangastaðarins. Við komuna á Hvammstanga var farangrinum komið fyrir í grunnskóla staðarins, liðið græjað í keppnisfatnað og haldið á völlinn. 

Fyrsti leikur dagsins var gegn Hetti/Einherja sem höfðu unnið fyrri leik liðanna 6-0 í byrjun júní. Dagsskipun liðsins var að verjast og beita skyndisóknum sem gekk eftir því enginn annar en Árni Busk braut 4 ára markaþurrð sína með því að koma okkar liði yfir 1-0. En Árni og strákarnir voru ekki lengi í paradís því í næstu sókn á eftir jöfnuðu Austanmenn 1-1. Hamarsdrengir héldu haus út leikinn og vörðust gríðarlega vel með Stebba “klett” í markinu og Viktor, Jóa og Bárð fyrir framan sem áttu leik lífs síns. Jafntefli varð því niðurstaðan og Hamarsdrengir mjög sáttir og gátu vel við unað enda frábær leikur af þeirra hálfu. 

Annar leikur dagsins var gegn heimamönnum í Kormáki/Hvöt. Sá leikur var eins slakur og sá fyrri var góður. Því miður náðu stákarnir ekki upp sömu baráttu og í fyrri leiknum og brast að auki úthald mjög fljótt. Fyrri leik liðanna í júní lauk með sigri Kormáks/Hvatar 6-1 en þessa helgi unnu þeir 4-0 eftir að hafa leitt 3-0 í hálfleik. Fyrri hálfleikurinn var skelfilegur en með smá peppi í hléi tóku strákarnir sig saman í andlitinu og mættu einbeittari til leiks í þem síðari. 

Að loknum leikjum dagsins var skolað af sér í sundlaug staðarins og haldið í Sjoppuna, veitingastaðinn á Hvammstanga, í hamborgaraveislu. Svo var rölt um bæinn og mannlíf staðarins skoðað. 

Sunnudagurinn byrjaði með grilluðum morgunverði “a la Busk-samlokugrill” sem vakti liðið og kom þeim af stað. Fyrri mótherjar dagsins voru taplausir BÍ/Bolvíkingar. Taktík liðsins var tekin í gegn og varnarlínan þétt enn frekar og stólað á Palla í indíána hlutverki fyrir framan vörnina og Oskar upp á toppi. Hamarsdrengir mættu ákveðnir til leiks og börðu niður alla sóknartilburði tilvonandi Íslandsmeistarana og fengu þrjú dauðafæri til að komast yfir í leiknum en með slysalegum hætti var það BÍ/Bolungarvík sem tók forystuna 1-0 sem var staðan er flautað var til hálfleiks. Seinni hálfleikurinn var ekki eins góður og gáfu strákarnir okkar svolítið eftir og urðu lokatölur 4-0, líkt og í fyrri hluta mótsins í júní. 

Lokaleikur helgarinnar var gegn Skallagrím. Hamarsdrengir höfðu unnið 10-1 stórsigur á fáliðuðum Borgnesingum í júní en nú var lið Skallagríms mannað 14 ferskum og sprækum drengjum sem höfðu veitt andstæðingum helgarinnar harða keppni enda gjörólíkt lið frá fyrri hluta mótsins. Dagsskipun Hamars var að halda vörninni en nú fengu þeir meira frjálsræði í sókninni. Árni kom Hamri yfir 1-0 með glæsilegu marki en Skallagrímur náði að jafna með glæsilegasta marki mótsins. Var þá komið að þætti Oskars. Framherjinn marklausi hafði fengið nóg og ákvað að taka til sinna ráða, smellti þrennu á Borgnesingana, sem svöruðu inn á milli með marki, og var staða því orðin 4-2 fyrir drengina okkar. Kom þá hræðilegur kafli í leik okkar liðs, Árni farinn meiddur af velli og enginn skiptimaður til taks. Borgnesingar gengu á lagið og jöfnuði 4-4 og í þokkabót var Jóa vísað útaf með rautt spjald eftir glórulausa tæklingu. Skammt var eftir af leiknum og fát komið á mannskapinn og þjálfarinn að fara á taugum á hliðarlínunni. Dómarinn hafði kallað 15 sek. eftir af leiknum er Palli sendi á Oskar af vinstri kantinum sem kom boltanum á Axel inn í teig þar sem hann var straujaður niður og vítaspyrna dæmd. Palli fór á punktinn og hamraði boltanum óverjandi í markið og kom okkur yfir 5-4. Miðjan var tekin en um leið var leikurinn flautaður af. Glæsileg endurkoma hjá Hamarsdrengjum þar sem barátta og þrautseigja skilaði sigri og 3 stigum í hús. 

Var nú brunað út í skóla til að taka saman og svo farið í sund til að slaka örlítið á fyrir ferðina heim. Svo var auðvitað stoppað í Staðarskála til að bæta á orkuforðann sem á hafði gengið eftir leiki helgarinnar. 

Axel kom sterkur inn og bjargaði okkur alveg með þátttöku sinni og framlagi á vellinum. Bárður átti frábært mót og var eins og klettur í bakverðinum og stórhættulegur fram á við. Jói stýrði vörninni eins og herforingi og Viktor stóð sig eins og hetja og leysti sínar stöður eins og til var ætlast. Palli “playmaker” var að gera góða hluti á kantinum og á miðsvæðinu og Árni, sem var á einum fæti alla helgina, átti flotta leiki og flott mörk. Oskar “stræker” komst vel frá sínum hlutverkum, hvort heldur sem framherji eða sem miðvörður og Stebbi, sem var langbesti markmaður mótsins, átti hvern stórleikinn á fætur öðrum. 

Allt í allt mega drengirnir vel við una og geta gengi stoltir frá verkefni helgarinnar. Lagt var upp með að við lok hver leiks skyldu drengirnir finna það hjá sér að þeir væru stoltir af sínu framlagi og að þeir hefðu gefið allt sem þeir áttu hverju sinni. Vissulega má bæta nokkra þætti drengjanna á knattspyrnuvellinum en fullt af hlutum voru, og eru, í lagi. Ástundun og einbeitin ásamt vilja og þrá á æfingum skilar miklu, það vita drengirnir og er ég viss um að leið þeirra á knattspyrnuvellinum liggur bara upp á við með því hugarfari sem þeir búa yfir og sýndu oft á tíðum um helgina. Æfingin er mikilvæg en aukaæfingin skapar meistarann og framtíðin er björt hjá piltunum ef þeir tileinka sér það hugarfar og vinna eftir því. 

Þakkir fá Gizur og Ísafold sem sáu ekki bara um að ferja hluta drengjanna heldur héldu þeim einnig uppteknum með heilabrotsæfingum og skemmtunum ásamt ómetanlegum stuðningi innan vallar sem utan. 

Takk fyrir mig strákar, þetta er búinn að var skemmtilegur og góður tími með ykkur. Þið megið vera stoltir af ykkur, ég er það svo sannarlega. 

Kveðja,  
Hjörtur.

Eftirfarandi umfjöllin er fengin frá Sunnlenska.is

Hamar vann sannfærandi 4-0 sigur á Aftureldingu í 2. deild karla í knattspyrnu á Grýluvelli í kvöld.

hamar_fagnar_gegn_aftureldingu

Leikurinn var jafn í fyrri hálfleik og bæði lið fengu ákjósanleg færi en tókst ekki að skora og því var staðan 0-0 í hálfleik.

Hvergerðingar létu hins vegar sverfa til stáls í seinni hálfleik og strax á 47. mínútu skoraði Aron Smárason með skalla eftir hornspyrnu.

Aron lét aftur til sín taka í vítateig Aftureldingar á 70. mínútu en var togaður niður og Hamarsmenn fengu víti. Ágúst Örlaugur Magnússon fór á punktinn og skoraði af öryggi.

Lánsmaðurinn frá Selfossi, Abdoulaye Ndiaye, lék á alls oddi í seinni hálfleik og hann skoraði tvö mörk á fimm mínútna kafla undir lok leiks. Á 78. mínútu fengu Hamarsmenn aukaspyrnu, Ragnar Sigurjónsson skallaði fyrir markið og þar kom Ndiaye aðvífandi og potaði boltanum í netið. 

Seinna mark hans var öllu glæsilegra þegar hann fékk boltann á vítateignum og plataði Mosfellinga með liprum fótahreyfingum áður en hann hamraði boltann í markhornið.

Stigin þrjú voru Hamri virkilega mikilvæg því á sama tíma gerðu Fjarðabyggð og KFR 1-1 jafntefli í uppgjöri botnliðanna. Hamar er nú með 11 stig í 10. sæti, Fjarðabyggð hefur 6 og KFR 5.

Hamarspiltar í meistaraflokki taka á móti Mosfellingunum í Aftureldingu á Grýluvelli í kvöld kl. 19:00 

Hlutskipti liðanna í sumar hefur verið ólíkt, Afturelding að berjast um að komast upp um deild en strákarnir okkar að losa sig frá fallsætunum. Bæði lið hafa styrkt hópa sína nokkuð í félagaskiptaglugganum í þeirri von að ná sínum markmiðum fyrir lok tímabilsins. 

Fyrri leikur liðanna fór 2-1 fyrir Mosfellinga sem máttust teljast heppnir að landa sigri þar. Drengirnir okkar ætla ekki að láta heilladísirnar hanga í liði gestanna, heldur hafa þeir tekið dísunum opnum örmum og var lögð mikil áhersla að ganga frá félagaskiptum þeirra fyrir miðnætti í gær er félagaskiptagluggi KSÍ lokaðist. 

Það er því von á stórleik í kvöld á Grýluvelli kl. 19:00 og hvetjum við Hvergerðinga sem og aðra stuðningsmenn Hamars til að fjölmenna á völlinn og styðja Hamars til sigurs. 

Áfram Hamar!!!

Knattspyrnudeild Hamars auglýsir eftir knattspyrnuþjálfara fyrir yngri flokka deildarinnar. Viðkomandi þurfa að geta hafið störf um mánaðarmótin ágúst/september, þegar æfingar hefjast í Hamarshöllinni.

Nánari upplýsingar veitir Ólafur Jósefsson, yfirþjálfari, í síma 821-4583. Einnig er hægt að senda tölvupóst á netfangið: olijo@internet.is