Höttur frá Egilsstöðum mætti í frystikistunna í Hveragerði í kvöld. Höttur sem sat í 3 sæti fyrir leikinn mátti ekki við því að missa af stigunum en þeir reyna að halda í heimavallaréttinn fyrir úrslitakeppnina. Hamarsmenn voru þó í 8.sæti og þurftu stigin tvö í baráttunni um það fimmta.
Fyrsti leikhluti fór vel af stað fyrir gestinna, en þeir skoruðu fyrstu 5 stig leiksins, áður en að Halldór svaraði fyrir heimamenn með þrist. Hattarmenn héldu yfirhöndinni í byrjun eða alveg þangað til í stöðunni 14-15. Þá tóku heimamenn í Hamri sig til og settu 11 stig gegn tveimur og staðan 25-17 eftir fyrsta leikhluta.
Í öðrum leikhluta var svo áfram haldandi gangur á leik Hamars, þeir nýttu sér götótta vörn gestanna og ragan sóknarleik og keyrðu hvað eftir annað í bakið á þeim. Þeir skoruðu 19 stig á móti sex stigum Hattar og var staðan 44-23. Eitthvað sem fáir hefðu búist við fyrir viðureign þessara liða, nema kannski þeir sjálfir. Höttur náði þó aðeins að bíta frá sér undir lokinn og rétta aðeins úr kútnum 46-30 var staðan í hálfleik.
Atkvæðamestur var Halldór Jónsson með 14 stig 4/5 í þristum.
Byrjunin á þriðja leikhluta var þó allt annar fyrir gestinna sem virtust hafa fengið vænan orkudrykk í hálfleik. Þeir skoruðu 19 stig á móti níu stigum Hamars og staðan skyndilega orðin einungis sex stig 55-49. Sigurður Hafþórsson átti þó frábæran leik fyrir Hamar og þaggaði hann niður í Hattarmönnum, fyrst með rándýru reverse lay-up og síðan með þriggja stiga körfu úr horninu. Þessi barátta Sigurðar virtist kveikja í heimamönnum sem að gengu á lagið og komust aftur í gott forskot 69-54.

Fjórði og síðasti leikhlutinn var síðan líkt og eitthvað handónýtt fíkniefni fyrir Hött. Í hvert skipti sem þeir komu með áhlaup, svaraði Hamar með betra áhlaupi. Gestirnir létu flest allt fara í taugarnar á sér, og jafnvel eftir fína vörn og hafa unnið boltann, ákvað Bracy að klappa framan í Halldór og uppskar hann tæknivillu fyrir vikið. Þetta var þó ekki eina tæknivillan sem fór á lið Hattar því einnig fengu Viðar Örn og Hreinn Gunnar sitthvora fyrir kjaftbrúk. Það var því Hamar sem sigldi auðveldlega í gegnum fjórða leikhlutan og pakkaði Hattarmönnum saman og sendu þá í fýluferð heim Austur á Hérað. Heimamenn í Hamri geta þó vel við unnað en framundan er hörkubarátta um 5 sætið sem gefur þátttöku í úrslitakeppninni um laust sæti í úrvalsdeild. Hamarsmenn sitja í 7.sæti með 12.stig líkt og Fsu, Breiðablik og ÍA. Næsti leikur Hamars er svo fyrir norðan gegn topliði Tindastólls.
Halldór Jónsson var stigahæðstur hjá Hamri með 26 stig, Danero var með 25 stig, 11 fráköst og 5 stoðsendingar en Sigurður Hafþórsson kom af bekknum með 18 stig.
Hjá gestunnum voru það Bracy og Robinson með 23 stig hvor en Robinson bætti við 12 fráköstum.

Hamarsmenn heimsóttu Skagamenn á skipaskaga í gærkvöldi og úr varð hörkuleikur! Hamarsliðið byrjaði leikinn með miklum látum og komust í 16-4, Danero og Halldór voru að hitta vel hjá Hamarsmönnum. Skagamenn vöknuðu þá til lífsins og náðu góðri rispu og komust í fyrsta skipti yfir 19-18 en þá gáfu strákarnir frá Hveragerði aftur í og leiddu 25-22 eftir 1. leikhluta.

Heimamenn byrjuðu mun betur í 2. leikhluta en á meðan var einhver værukærð yfir Hamarsmönnum. Tölur eins og 34-28 og 40-33 sáust fyrir þá gulklæddu. Aftur spíttu Hamarsdrengir í og komust aftur yfir í stöðunni 47-46 með glæsilegum þristi frá Danero en drengurinn var að spila óaðfinnanlega í gær! Hamarsmenn leiddu 54-53 í hálfleik og ekki var mikið um varnir en þess í stað var sóknarleikur beggja liða góður og leikurinn var mjög hraður.

Eitthvað hafa Hamarsdrengir farið yfir varnarleikinn í hálfleik því liðið spilaði frábæran varnaleik í öllum 3. leikhluta og stungu heimamenn af! Tölur í leikhlutanum voru eins og 66-57 og 81-62, Hamarsdrengjum í vil. Hamar vann leikhlutann 27-11 og eins og áður sagði frábær varnarleikur hjá liðinu í þessum leikhluta.

Í upphafi 4. leikhluta náði Hamar 23 stiga forustu 87-64. En aftur eins og fyrr í leiknum gáfu þeir aðeins eftir og Skagaliðið náði smá áhlaupi og þegar fjórar mínútur voru eftir var staðan 93-80 Hamri í vil. Það var akkurat sá stigamunur sem skildu liðin af í fyrri leiknum sem spilaður var í Hveragerði. Þetta vissu Hamarsmenn og ætluðu þeir að vinna leikinn með meira en þeim mun til að komast uppfyrir skagann á betri innbirgðisviðureign. Þegar tvær mínútur voru til leiksloka var munurinn allt í einu orðin 7 stig 99-92 fyrir Hamri. Þá fór skagaliðið einhverja hlutavegna að brjóta það sem eftir lifði leiks og kláraði fyrirliði Hamars Halldór Jónsson leikinn með nokkrum vítaskotum en hann hitti úr 9 af 10 vítum sem hann fékk. Lokatölur 112-98 og Hamar fór uppfyrir skagann á betri innbirgðis.

Frábær sigur og liðið hefur nú unnið tvo leiki í röð og greinilegt ef marka má þessa fyrstu tvo leiki ársins þá er liðið í mun betra standi en fyrir jól. Þegar 10 umferðum er lokið af 18 er liðið aðeins 2 stigum á eftir 4. og 5. sæti en 5. sæti er síðast sætið inní úrslitakeppnina. Hamar situr í 7. sæti með 8 stig.

Maður leiksins í gær var Danero Thomas með 47 stig, 9 fráköst og 5 stoðsendingar. Magnaður leikur hjá kappanum og á tímabili var hann á eldi og það var allt í! Halldór Jónsson sallaði niður 19 stigum. Snorri Þorvaldsson setti 14 stig. Aron Eyjólfsson var með 11 stig og 10 fráköst en barátta hans smitar mikið útfrá sér og hann var að spila líklega sinn besta leik fyrir Hamar. Bjartmar Halldórsson stjórnaði leik liðsins af stakri snilld og var með 10 stoðsendingar og auk þess að skila 5 stigum. Allir aðrir leikmenn liðsins skiluðu sínu og spiluðu mjög vel!

Næsti leikur hjá strákunum er næstkomandi fimmtudag í frystikistunni kl:19:15 en þá koma Vængir Júpitersmenn í heimsókn.

Það var öruggur sigur okkar stúlkna í Dominos deildinni í kvöld, en ekki þó fyrirhafnar laus. Loka staðan 57-73 og Hamar komið í 4. sæti deildarinnar en með sama stigafjölda og Valur og  Grindavík eða 10 stig.

Það var góð byrjun í kvöld hjá Hamri sem komust í 0-9 en Grindavíkur stúlkur gáfu ekki svo létt eftir. Staðan 20-24 eftir fyrsta leikhluta og 36-38 í hálfleik. Erfiðlega gékk að eiga við Lauren Oosdyke hjá þeim gulu sem var með 20 stig og 13 fráköst í fyrri hálfleik einum.

Okkar stúlkur sýndu yfirvegum í síðari hálfleik og eftir 5 mínútur í 3ja leikhluta, í stöðunni 47-48, gaf Grindavíkur stúlkur eftir og skoruðu aðeins 10 stig á síðustu 15 mínútum leiksins gegn 25 stigum Hamars. Betur gékk að stöðva Oosdyke sem skoraði aðeins 5 stig í síðar hálfleik.

Marín Laufey var öflug, sérstaklega í síðari hálfleik, með 20 stig og tók 18 fráköst, Di’Amber setti 20 stig, 6 fráköst og 8 stoðsendingar. Fanney Lind skoraði 17/6 fráköst, Íris Ásgeirsdóttir 11/8 stolnir boltar og Jenný Harðardóttir 5 stig.  Öll tölfræði úr leiknum hér. 

Dagný Lísa var ekki með í kvöld vegna meiðsla en verður að öllu óbreyttu með gegn Val í næsta leik.

Þess má að lokum geta að Lárus Ingi formaður er veikur heima eftir dóm aganefndar sem byrtur var í dag. Þar er Hamri gert að greiða  15 þúsund í sekt fyrir framkomu hans í garð dómara í lok leiks Hamars og Keflavíkur á sunnudaginn. Spurning hvort formaðurinn hafi lagst undir feld út af sektarkennd? 

 Mynd: Guðmundur Erlingsson