Posts

AÐALFUNDUR 2024

FUNDARBOÐ

Íþróttafélagið Hamar heldur aðalfund í Grunnskólanum í Hveragerði

Mánudaginn 11. mars 2024 kl. 20:00

Fundarefni:

  1. Fundur settur.
  2. Kosinn fundarstjóri og fundarritari.
  3. Farið yfir ársskýrslu félagsins.
  4. Gjaldkeri leggur fram reikninga félagsins til samþykktar.
  5. Umræður um skýrslu formanns og gjaldkera og reikningar félagsins bornir upp til samþykktar.
  6. Verðlaunaafhending og kjör íþróttamanns Hamars.
  7. Lagabreytingar.
  8. Gjaldkeri leggur fram fjárhagsáætlun aðalstjórnar til samþykktar og deilda til staðfestingar.
  9. Stjórnarkjör.
  10. 10.Skoðunarmenn kosnir.
  11. 11.Önnur mál.

Verið velkomin

Stjórnin

Hamar hrúgaði inn verðlaunum á Unglingameistaramóti UMFA um helgina. 

Úlfur Þórhallson vann tvö silfur í U17A í einliða- og í tvíliðaleik með Ástþóri Gauta Þorvaldssyni TBR. Rakel Rós Guðmundsdóttir sigraði einliðaleik í U17 og fékk silfur með Rebekku Einarsdóttur í tvíliðaleik. Rebekka keppti upp fyrir sig í tvíliðaleik en vann svo tvö gull í sínum flokki U15B í einliða- og tvenndarleik. Hún sigraði tvenndarleikinn með Vilhjálmi Hauk Leifs Roe. Vilhjálmur sigraði sömuleiðis tvíliðaleik ásamt Birgi V. Kristinssyni úr BH.

Hugrún Björk Erlingsdóttir, Matthías Þór Eyþórrson, Arnfríður Óladóttir og Hulda María Hilmisdóttir lentu öll í 3 sæti í U15B flokknum. Natan Rafn Valkyrjuson og Sigurbjörn Friðriksson lentu í 3ja sæti í U13B. 

Íris Þórhallsdóttir fékk eitt gull og tvö silfur í U13B. Silfur í einliðaleik og í tvíliða með Aldísi Davíðsdóttur úr TBR og svo gull í tvenndarleik með Nam Quoc Nguyen úr KR. En Íris og Sigurbjörn eru enn í U11 en fengu að keppa upp fyrir sig í þessu móti þar sem ekki var keppt i þeirra aldursflokki.

Virkilega góður árangur Hamarskrakkanna – framtíðin er björt. ÁFRAM HAMAR!!!

Öll úrslit og leiki má finna hér.

Aðalfundur Sunddeildar Hamars verður haldinn þriðjudaginn 6. febrúar kl. 17:30 – 18:15 í Mjólkurbúinu í Grunnskólanum í Hveragerði.

Venjuleg aðalfundastörf. Allir foreldrar sem og iðkendur eru hvattir til að mæta. Vinnum saman að því að búa til öfluga sunddeild.

Hlökkum til að sjá ykkur sem allra flest.

Bestu kveðjur,

stjórn Sunddeildar Hamars.

Gleðilegt nýtt ár! Það eru væntanlega ófáir sem hafa strengt þess heit eftir konfektgraðk jólanna að huga að heilsunni, og því ekki úr vegi að kíkja í ræktina hér í heimabyggð.

Skráning í Laugasport og Hamarsport fer fram í gegnum Sportabler – Laugasport hér Hamarsport hér.

Hér má svo sjá verðskránna fyrir Laugasport –

Og hér er Hamarsport –

Stundaskrá Hamarsports má svo sjá hér –

Hlökkum til að sjá ykkur í ræktinni!

Íslandsmót öldunga í badminton fór fram í Strandgötunni í Hafnarfirði dagana 17. – 18. nóvember í samvinnu við Badmintonfélag Hafnarfjarðar. Spilað var í flokkum 35+ og uppúr í 15 greinum. Alls tóku 47 leikmenn þátt frá fimm félögum, TBR, BH, UMFA, KR og Hamri. Hamar átti einn fulltrúa að þessu sinni og náði Hrund Guðmundsdóttir í úrslit í tvenndarleik 35 – 49 A og tvíliðaleik 45 – 54 A. Hamar sendir vonandi fleiri meistara til að spila í þessu skemmtilega móti á næsta ári. Öll úrslit leikja og myndir má finna hér.

Njördur Ludvigsson TBR, Elsa Nielsen TBR, Hrund Guðmundsdóttir Hamar, Einar Óskarsson TBR
Elsa Nielsen TBR, Anna Lilja Sigurðardóttir BH, Hrund Guðmundsdóttir Hamar, Sigrún Marteinsdóttir TBR
Engin lýsing til

Róbert yfirþjálfari valdi níu krakka til að taka þátt í sterku móti í TBR um helgina þar sem 105 keppendur tóku þátt. Mótið er fyrsta A-mót vetrarins þar sem allir bestu badmintonspilarar landsins kepptu í flokkum U11 – U19. Krakkarnir fengu aldeilis að spreyta sig á móti þeim bestu og sáum við vel hvað sumaræfingarnar hafa skilað sér. Íris Þórhallsdóttir varð tvöfaldur Reykjavíkurmeistari í Snótum U11 en hún sigraði í tvíliðaleik með Ronju Vignisdóttur úr Hamri og tvenndarleikinn með Nam Quoc Nguyen úr KR. Íris fékk einnig silfur í einliðaleik en Lilja Guðrún Kristjánsdóttir úr BH sigraði flokkinn.
Úlfur Þórhallsson fékk silfur í tvíliðaleik Drengir – U17 með félaga sínu úr Birni Ágústi Ólafssyni úr BH en þeir töpuðu fyrir Eggerti Þór Eggertssyni og Óðni Magnússyni úr TBR.
Það er greinilegt að sumaræfingarnar eru að skila sér í hús því við áttum sjö spilara í undanúrslitaumferðinni á sunnudeginum og sýndu þau öll að þau geta vel spilað í A-flokks mótum í vetur.

Vel gert krakkar – ÁFRAM HAMAR!!
Öll úrslit úr mótinu má finna hér.

Ljósmynd: TBR

Nú eru æfingar byrjaðar hjá deildinni og er hægt að finna allar upplýsingar um æfingatíma og æfingagjöld hér á síðunni. 

Börn og unglingar
Barna- og unglingastarfið fer vel af stað. Vegna plássleysis er ekki hægt að getu- eða aldursskipta æfingunum eins og er. Róbert hefur Úlf með sér með yngstu hópana í fjölgreinunum og sömuleiðis fær hann hjálp frá Gogga vélmenni sem deildin hefur fjárferst í. Hægt er að stilla Gogga á mismunandi hraða og forrita hann í allskonar æfingar. Krakkarnir munu þá sjá bætingar hjá sér í fótaburði, hraða o.fl eftir því sem þau fá að spreyta sig á erfiðari stillingum. 
Skráning fyrir börn og unglinga fer fram hér í Sportabler. 


Fullorðinshópar
Við bjóðum upp á tíma á sunnudögum 18.30 – 21.00 fyrir trimmara sem vilja spila sér til heilsubótar. Í boði er að kaupa 10 tíma klippikort í tímanum eða skrá sig allan veturinn á Sportabler.  Spilað er með plastkúlum en í boði er að kaupa fjaðrabolta hjá þjálfara fyrir þá sem kjósa að spila með svoleiðis lúxus. 

Keppnishópur
Hamar á nokkra leikmenn í keppnishóp sem stefna á að taka þátt í Deildakeppni BSÍ og fleiri fullorðinsmótum í vetur í 1. og 2. deild. Við viljum endilega fá fleiri gamlar keppniskempur með okkur á æfingar og þau mega gefa sig fram við Róbert yfirþjálfara og koma og prófa að spila með.

Fjáraflanir
Við stefnum á að fara með krakkana í keppnis- eða æfingaferð í vetur og kannski í fleiri en eina. 6. september sl. Var deildin okkar með dósasöfnun. Allur ágóðinn af þessum gjörningi rennur beint í barna- og unglingastarfið. Við höfum getað gefið krökkunum boli og borgað mótsgjöld síðustu árin. En til að það sé áfram hægt þurfa allir að leggjast á eitt. Það var fámennt en góðmennt þetta kvöld og við stefnum alltaf á að klára að hlaupa í hús á tveimur klukkustundum svo þetta er alls ekki mikil viðvera. Við erum þakklát Hveragerðisbæ að fá inni í áhaldahúsi bæjarins sérstaklega á svona rigningardögum og eins þegar fer að frysta. Í lokin er alltaf pizzuveisla og gott spjall. Vonum að fleiri sjá sér fært að taka þátt í þessu með okkur næst. 

Við minnum á æfingarnar í sunddeildinni:

Æfingatímar 2022 – 2023:

Flugfiskar (1. og 2. bekkur) æfir á föstudögum kl. 12:45 – 13:30

Selir (3.- 5. bekkur) æfir á þriðjudögum og fimmtudögum kl. 16:00-16:45 og á föstudögum kl. 13:30 – 14:30.

Höfrungar (6. bekkur og eldri) æfir á þriðjudögum og fimmtudögum kl. 16:30-18:00 og á föstudögum kl. 13:30 – 14:30.

Auðvitað eru æfingarnar fyrstu tvær vikurnar í september opnar, svo öll börn geta komið og prófað sundið.

Skráning í sunddeildina er hafin hér inni á Sportabler: https://www.sportabler.com/shop/hamar/sund

Þar er hægt að skrá börnin í allt tímabilið, frá ágúst og út júní, eða fram til áramóta.

Ekki er komin skráning fyrir 1. og 2. bekk þar sem Íþróttafélagið Hamar sér um þá skráningu. Það er von á henni von bráðar inn í Sportabler.

Þeir sem eru ákveðnir í því að æfa sund í vetur geta skráð sig þar núna.

Hlökkum til að sjá sem flesta í sundi 🙂

Bestu kveðjur frá stjórn og þjálfara.

Inngangur

Íþróttafélagið Hamar hefur nú verið án Hamarshallarinnar síðan í febrúar á þessu ári. Síðan þá hefur Íþróttafélagið Hamar unnið með bæjaryfirvöldum að því verkefni að sambærileg aðstaða eða betri yrði komið á legg eins fljótt og auðið er, því við erum í kapphlaupi við tímann ef við ætlum ekki að sjá fram á stórlega skaðað íþróttastarf í Hveragerði næstu árin. 

Það er samfélagsleg ábyrgð okkar, Hamars og Hveragerðisbæjar, að halda uppi íþróttastarfi fyrir bæjarbúa og hjá Íþróttafélaginu Hamri starfa hundruðir sjálfboðaliða sem hafa lagt sitt af mörkum til að svo sé í dag. 

Það er gríðarlega mikilvægt fyrir lýðheilsu íbúa Hveragerðis að við fáum upp viðunandi aðstöðu sem fyrst, að uppbygging á íþróttaaðstöðu haldi áfram og verði bæjarfélaginu til sóma.  Hveragerði hefur lagt mikið upp úr að vera heilsueflandi samfélag en í dag er erfitt að halda uppi þeim stimpli þar sem aðstaða til íþróttaiðkunar er tekin aftur um 10 ár með falli Hamarshallarinnar. Þannig verður staðan þangað til Hamarshöllin rís aftur og því lengur sem hún liggur niðri, því erfiðara verður fyrir okkur að koma starfinu á sama stall aftur. Margir hagsmunahópar sitja nú eftir með sárt ennið þar sem Hamarshöllin þjónustaði mjög fjölbreyttan hóp á öllum aldri en auk Íþróttafélagsins Hamars var aðstaða fyrir golfiðkun, gönguhópa, eldri borgara auk þess sem ýmsir viðburðir skiluðu tekjum fyrir deildir Hamars og aðra í okkar nærumhverfi. 

Íþróttafélagið Hamar á sér langa sögu í okkar samfélagi en félagið fagnar 30 ára afmæli á þessu ári. Í stað þess að fagna og vera stolt af okkar aðstöðu þá er félagið nú á óvissutímum. Engar fregnir berast af því hverjar áætlanir nýs meirihluta eru varðandi uppbyggingu íþróttastarfs þótt sóst sé eftir því. Horfa verður bæði til skamms og langs tíma í senn, nú er tíminn til að reisa Hamarshöllina eins fljótt og auðið er jafnframt því sem við þurfum að vinna í stefnumótun og byggja upp íþróttastarfið til framtíðar. Samráð og samtal þarf að eiga sér stað og vonumst við til að farsælt samstarf bæjarfélagsins og íþróttafélagsins haldi áfram að vaxa og dafna. Íþróttafélagið Hamar telur 6 deildir og áhyggjur deildanna snúa að okkar iðkendum, þjálfurum og sjálfboðaliðum sem stóla á félagið því án aðstöðu í haust/vetur mun íþróttastarfið okkar bera stóran skaða, sjálfboðaliðum mun fækka, þjálfarar hverfa og iðkendur hætta eða fara í önnur félög.

Íþróttafélagið biður um svör við eftirfarandi spurningum:

  1. Í nýjum málefnasamningi meirihlutans kemur fram: “Skoða kosti varðandi uppbyggingu Hamarshallarinnar og annarra íþróttamannvirkja” Má skilja þetta sem svo að nýr meirihluti hafi ekki tekið ákvörðun um viðbrögð vegna falls Hamarshallarinnar ennþá? Ef svo er, hvenær megum við eiga von á því að sjá einhverja niðurstöðu í því?
  2. Mun Hamarshöllin rísa aftur í haust/vetur? Ef svo er, hvernig er áætlunin um endurreisn hennar? Ef  svo er ekki, þá biðjum við um að fá upplýsingar hið fyrsta hvert planið er svo við getum skipulagt okkur skv. því.
  3. Íþróttafélagið Hamar hefur óskað eftir fundi með nýjum meirihluta síðan úrslit kosninga voru ljós. Hvenær á Íþróttafélagið von á því að fá fundi með nýjum meirihluta og beina aðkomu að málefnum Hamarshallarinnar og Íþróttafélagsins eins og óskað hefur verið eftir?
  4. Íþróttafélagið Hamar er stærsti einstaki hagsmunaaðili í Hveragerði þegar kemur að uppbyggingu íþróttamannvirkja. Mun nýr meirihluti forgangsraða verkefnum sem snerta það beint í samráði við Íþróttafélagið (sjá greinargerð fyrir neðan)?
  5. Munu fulltrúar frá Íþróttafélaginu Hamri fá sæti í nefnd íþróttamála á þessu kjörtímabili?

Greinargerð um afstöðu Íþróttafélagsins Hamars til aðstöðu til skemmri og lengri tíma:

Aðalstjórn Íþróttafélagsins Hamars er einhuga um knýja fram eftirfarandi forgangsröðun verkefna Hveragerðisbæjar í þágu félagsins, (staðfest á fundi aðalstjórnar í apríl og maí 2022)

  1. Koma upp aðstöðu eins og deildir Hamars höfðu fyrir hrun Hamarshallarinnar með úrbótum sem Íþróttafélagið hefur komið á framfæri við bæjaryfirvöld (áætlaður kostnaður vegna endurreisn Hamarshallarinnar í töluvert endurbættri mynd er um 300 milljónir kr eða ca 200m+ nettó). Þetta er mjög mikilvægt til þess að:
    1. Sporna við brottfalli iðkenda, þjálfara og sjálfboðaliða hjá Knattspyrnudeild og Fimleikadeild sökum aðstöðuleysis.
    2. Sporna við brottfalli iðkenda, þjálfara og sjálfboðaliða hjá öðrum deildum Hamars sökum fækkun tíma í íþróttahúsi. Ef nýtt hús er ekki komið upp í haust erum við að horfa á rúmlega 50% fækkun á tímum sem mun bitna beint á jafn yngri iðkendum og afreksstarfi. 50% fækkun á tímum þýðir t.d. æfingar annan hvern dag í staðinn fyrir daglegar æfingar hjá meistaraflokkum félagsins. 50% fækkun þýðir líka fækkun á æfingatímum og stytting í æfingatímum hjá yngri iðkendum félagsins (badminton/blak/karfa/fimleikar/fótbolti)
  2. Bæta rekstrarskilyrði fyrir sunddeild í Laugaskarði, m.t.t. hitavandamála.
  3. Vinna með bæjaryfirvöldum að því að móta hvernig staðið skuli að uppbyggingu framtíðaraðstöðu fyrir fimleika, badminton, körfubolta og blak, með sérstaka áherslu á fimleika fyrst ef ekki er hægt að byggja upp aðstöðu fyrir allar þessar deildir samtímis.

Við óskum eftir því að svör berist Íþróttafélaginu eins fljótt og auðið er, það er mikilvægt að allri óvissu sé eytt sem fyrst svo við getum byrjað að skipuleggja okkur og undirbúa fyrir þann veruleika sem tekur á móti okkur í haust.

Áfram Hamar!

F.h. Aðalstjórnar Íþróttafélagsins Hamars,

Þórhallur Einisson, formaður.