Meistaraflokkur Hamars átti ekki velgengni að fagna á tveimur erfiðum útivöllum í seinustu viku. Þriðjudaginn 10 ágúst var haldið á Ísafjörð og leikið við BÍ/Bolungarvík þar lauk leik með sigri heimamanna 3-1. Síðar í vikunni var farið austur á land og spilað við Hött á Egilstöðum. Skemmst er frá að segja að Hamarsmenn áttu ekki erindi sem erfiði þar og töpuðu 5-0. Nú er að girða sig í brók og taka hressilega á móti Víði í næsta leik, á blómstrandi dögum í Hveragerði. Sá leikur getur skipt sköpum um fallsæti deildarinnar en einungis tvö stig skilja Hamar frá liðunum sem þar sitja.
Og mæta nú og hvetja strákana !
Knattspyrnudeild Hamars hefur tekið ákvörðun um að stofna 2. flokk karla fyrir næsta keppnistímabil! Þetta eru stór tíðindi fyrir Hamar og bæjarfélagið því 2. flokkur hefur ekki áður verið til staðar í Hveragerði. Upp úr 3. flokki eru að ganga margir efnilegir knattspyrnumenn sem nauðsynlegt er að halda vel utanum og við vonum að leikmenn sem leitað hafa í önnur félög undanfarin ár, eða hafa hætt, snúi aftur til baka. Allir leikmenn sem fæddir eru á árunum 1992, 1993 og 1994 eru gjaldgengir, en þar fyrir utan munu leikmenn U-23 liðsins fá að æfa með flokknum, auk einhverra yngri leikmanna. Það er von okkar að með þessu móti fáum við fleiri Hvergerðinga upp í meistaraflokk til að leika með aðalliði félagsins í framtíðinni. Flokkurinn, sem hefur æfingar í september, tekur þátt í Íslandsmót KSÍ og verður rekinn í nánu samstarfi við 2. deildarlið Hamars og fastlega má búast við að efnilegir leikmenn fái tækifæri á að spreyta sig með meistaraflokki.
Eldri flokkar Hamars hafa æft 4 - 5 sinnum í viku og hafa stöðugt verið að bæta sig.
3. flokkur í sameiginlegu liði Hamars og Ægis hefur tekið þátt í Íslandsmótinu og gengið upp og niður, en þó eru greinileg batamerki hjá liðinu. Flokkurinn fór líka ReyCup og stóð sig þar með sóma og endaði í 3. sæti. Nokkrir leikmenn úr 4. flokki hafa fengið að spreyta sig með 3. flokki og hafa þeir staðið sig ágætlega.
5. og 6. flokkur í sameiginlegu liði Hamars og Ægis hefur tekið þátt í B riðli 5. flokks á Íslandsmóti KSÍ í sumar og staðið sig vel. Við erum með fjögur lið og fyrirfram var búist við því að á brattann yrði að sækja, en liðin eru sífellt að ná betur saman eftir því sem strákarnir kynnast betur. Dagana 30/6 – 3/7 tóku drengirnir þátt í skemmtilegu N1 móti á Akureyri , sem er fjölmennasta mót sem haldið er fyrir 5. flokk á landinu. Leikir unnust og töpuðust á víxl en liðin luku mótinu með sigrum og allir skemmtu sér hið besta, sem er að sjálfsögðu aðalmálið.
| Valgeir Ásgeirsson | Formaður |
| Erla Pálmadóttir | Ritari |
| Rúna Einarsdóttir | Meðstjórnandi |
| Eyjólfur Harðarson | Mfl.ráð karla |
| Halldóra Rut Bjarnadóttir | Mfl.ráð kvenna |
| Steinar Logi Hilmarsson | Unglingaráð |
| Ómar I. Guðmundsson | Þjálfari yngri fl. |
| ....óskast..! | Vefumsjón |
Á Döfinni
