Tólf manna hópur úr hlaupahópi Hamars tók þátt í Laugavegshlaupinu 17. júlí. Hlaupið er 55 km. fjallahlaup frá Landmannalaugum í Þórsmörk. Frábært veður var á leiðinni, sól og hiti sem gerði sumum hlaupurum erfiðara fyrir.  Hópurinn hefur stundað stífar æfingar fyrir hlaupið frá því í september og hafa Pétur Ingi Frantzson og Elísabet "Lísa" Sigmundsdóttir verið óþreytandi að hvetja hópinn til dáða og þakka hlaupagarparnir þeim fyrir frábæran stuðning. Fyrstur Hamarsmanna var Sveinbjörn "Denni" Sveinbjörnsson á 6 klst og 50 min. en fyrst kvenna var Ida Løn á 7 klst 20 min. Þau sem luku hlaupinu, auk Sveinbjörns og Idu voru: Valdimar Hafsteinsson, Anton Tómasson, Stefán Árnason, Karolína Axelsdóttir, Sverrir Geir Ingibjartsson, Pétur Ingi Frantzson, Aðalheiður Ásgeirsdóttir, María Kristjánsdóttir og Hildigunnur Hjörleifsdóttir.  Almar Þorgeirsson lauk ekki hlaupinu en nokkrum mínútum munaði að hann næði tímamörkum í Emstrum, eftir 37 km. hlaup. Kim Andersen í hlaupahópi Hamars hljóp einnig hlaupið en hann var starfsmaður og var eftirfari og fær því ekki skráðan tíma. Hlauparar þakka öllum þeim sem aðstoðuðu við að aka bíla og hvetja hlaupara seinustu kílómetrana inn í Þórsmörk.   

Helgina 7.- 9. maí síðastliðin fór fram keppnin Þrekmeistarinn. Frá Hveragerði fór flottur hópur keppenda sem tóku þátt í liðakeppni, einstaklingskeppni og  tvenndakeppni og má þess geta að Þau Rúna Einarsdóttir og Pétur Pétursson náðu þeim glæsilega árangri að lenta í 3. sæti í tvenndarkeppninni.

Nýtt Boot-camp námskeið byrjaði í dag. Stór og myndalegur hópur hefur skráð sig og svo skemmtilega vildi til í dag að hlaupahópurinn slóst með í för. Til gamans má nefna að nokkrir úr hlaupahópnum voru vælandi seinna um kvöldið yfir harðsperrum.